Albin Kurti thotë se nuk ndihet i rrezikuar

Albin Kurti tha se nuk ndihet i rrezikuar pas kërcënimeve të marra. Kryeministri i Kosovës tha se organet e sigurisë janë ato që i vlerësojnë kërcënimet dhe i ndërmarrin veprimet në përputhje me rrethanat e caktuara.

“Janë mekanizmat e shtetit që i bëjnë vlerësimet kur ngjajnë kërcënime nëpër rrjete sociale, të cilat unë nuk kam mundësi t’i ndjek”, tha Kurti në një konferencë për media në Prishtinë.

Zëdhënësi i Qeverisë së Kosovës Përparim Kryeziu tha një ditë më parë se Albin Kurti është kërcënuar, ndaj është rritur edhe niveli i sigurisë ndaj tij.

“Kryeministri Kurti është kërcënuar. Për këtë arsye, si masë e kujdesit të shtuar, është rritur edhe niveli i tij i sigurisë. Institucionet e hetuesisë dhe sigurisë tashmë janë duke bërë punën e tyre. Ato bëjnë vlerësimet e nevojshme dhe ndërmarrin masat përkatëse. Në anën tjetër, kryeministri vazhdon angazhimin e tij të rregullt”, tha zëdhënësi i Qeverisë ditën e djeshme.