Alibali: Rama e ka kthyer Parlamentin zyrë noteriale, Opozita ra në kurth

Analisti Neritan Alibali komentoi në “Review” me Greta Topjanën situatën e tensionuar në seancën plenare të së enjtes, e cila u ndërpre për shkak të kundërshtimeve të forta nga opozita, pas prezantimit nga Kryeministri Edi Rama të ministres virtuale “Diella” në Kuvend.

Sipas Alibalit, sjellja e Ramës në Kuvend është vazhdim i një modeli qeverisës që e ka kufizuar rolin e parlamentit në mënyrë sistematike, sidomos pas pandemisë.

“Situata e Covidit bëri që të shfrytëzohej një ligj kushtetues ku, me aktet normative me fuqinë e ligjit që kapërcejnë Parlamentin, i jepet e drejta qeverisë për të vepruar në kushte nevoje dhe urgjence. Më pas këto akte duhet të miratohen nga Kuvendi brenda 45 ditëve,” –u shpreh Alibali.

Sipas tij, kjo periudhë ka krijuar një komoditet për Kryeministrin Rama, i cili siç tha “e ka kthyer Parlamentin në zyrë noteriale.”

Nga ana tjetër, Alibali theksoi se edhe opozita nuk ka qëndruar brenda kufijve të lejuar të reagimit demokratik.

“Opozita ka vetëm një pushtet, fjalën në Parlament. Por ka abuzuar dhe tejkaluar të drejtën e saj me disa veprime agresive që ra në kurth. ”- shtoi ai.

Seanca e së enjtes u ndërpre mes tensioneve, ndërsa prezantimi i ministres virtuale u konsiderua nga përfaqësuesit e opozitës si një veprim antikushtetues dhe provokues.