Çipa: Një qeverisje e mençur i merr disa nga diaspora dhe u jep vende në administratë!

Gazetari Aleksandër Çipa, i ftuar në emisionin Review në Euronews Albania, e cilësoi protestën që po zhvillohet në Tiranë prej 27 ditësh si një lëvizje të rëndësishme, e cila sipas tij duhet të prodhojë zgjidhje.

Ai theksoi se nuk është dakord me krahasimet mes zhvillimeve të sotme dhe atyre të vitit 1991, duke nënvizuar se situata aktuale ka një dinamikë tjetër.

“Ka një pjesë që e shikon me skepticizëm, por çdo krizë është shtatzënë me zgjidhje. Ne jemi në një proces të tillë, që është i natyrshëm”, u shpreh Çipa.

Duke u ndalur te roli i diasporës, gazetari tha se Shqipëria duhet të shfrytëzojë potencialin e saj, veçanërisht në administratën publike.

“Na kishte marrë malli të shihnim diasporën. Një qeverisje e mençur duhet të marrë disa nga ata të diasporës dhe t’u japë vende në administratë. Kjo është një administratë që thotë se ka qindra vende bosh”, deklaroi ai.

Çipa u shpreh kritik ndaj gjendjes së shoqërisë, duke shtuar se aktivizimi i diasporës mund të shërbejë si një mundësi për ta vitalizuar atë.