Ambasada amerikane: SHBA-ja mbështet përpjekjet e prokurorëve për të fuqizuar shtetin e së drejtës

Ambasada amerikane në Tiranë, nëpërmjet një postimi në Facebook, shkruan se SHBA-ja mbështet përpjekjet e prokurorëve shqiptarë për të çuar përpara reformën në drejtësi, për të fuqizuar shtetin e së drejtës dhe për të forcuar më tej institucionet demokratike.

“Prokurorët në Shqipëri janë në vijën e parë të luftës kundër korrupsionit, krimit të organizuar, pastrimit të parave dhe trafikimit të narkotikëve. Ambasada e Shteteve të Bashkuara të Amerikës mbështet përpjekjet e tyre për të çuar përpara reformën në drejtësi, për të fuqizuar shtetin e së drejtës dhe për të forcuar më tej institucionet demokratike”, thuhet në postimin e ambasadës.

Ndërkohë, njoftohet se kjo ambasadë ka dhuruar pajisje për të mbështetur kapacitetin hetues të Zyrës së Prokurorit të Përgjithshëm.

“Këtë javë, Drejtori i Çështjeve Ndërkombëtare të Drogës dhe Zbatimit të Ligjit, Ben Rockwell dhe Këshilltarja Ligjore Rezidente, Michelle Lakomy diskutuan mbështetjen e SHBA-së me Prokurorin e Përgjithshëm, Olsian Çela. Ambasada dhuroi pajisje për të mbështetur kapacitetin hetues të Zyrës së Prokurorit të Përgjithshëm dhe për të arritur këto qëllime thelbësore për përparimin e Shqipërisë drejt integrimit të plotë evropian”, thuhet më tej në postimin e ambasadës.

Një ditë më parë, ambasadorja amerikane, Yuri Kim u shpreh se duhet treguar kurajë dhe integritet në procesin e vetingut në drejtësi, në mënyrë që të thyhen modelet e vjetra në Shqipëri.

Kjo deklaratë e ambasadores erdhi pas ankimimit të ONM-së për konfirmimin në detyrë të Elisabeta Imeraj.

LEXONI GJITHASHTU:

• ONM ankimon vendimin për konfirmimin në detyrë të Elisabeta Imerajt, reagon ambasadorja Kim
• Vettingu, KPK konfirmon në detyrë prokuroren Elisabeta Imeraj
• Drejtësia dhe apeli i Yuri Kim, Ylli Manjani: Ndërhyrja e ambasadës amerikane, presion i papranueshëm