Ambasadori i ri amerikan në Kosovë, presidenti Biden nominon Jeffrey M. Hovenier

Presidenti i Shteteve të Bashkuara, Joe Biden, ka nominuar për ambasador të SHBA-së në Kosovë, Jeffrey M. Hovenier.

Njoftimi është bërë me dije në faqen zyrtare të Shtëpisë së Bardhë.

Hovenier, i cili pritet të zëvendësojë ambasadoren aktual Kosnet, është një diplomat karriere i shërbimit të jashtëm amerikan që ka qenë pjesë e stafit të të Dërguarit të Posaçëm të Kombeve të Bashkuara për statusin e Kosovës.

Hovenier aktualisht është zv.shef i misionit të Ambasadës së SHBA-së në Ankara të Turqisë.

Ai gjithashtu ka shërbyer edhe në ambasadën e SHBA-së në Berlin si dhe në misionet e SHBA-së në Kroaci, Greqi, Panama, Paraguai dhe Peru.

Në Uashington ai ka kryer detyrën e Drejtorit për Çështjet të Evropës Qendrore dhe Juglindore në Këshillin e Sigurisë Kombëtare dhe në Byronë e Departamentit të Shtetit për Çështjet Evropiane dhe Euroaziatike me përgjegjësi për NATO-n dhe Çështjet e Evropës Qendrore.

Nominimi i tij duhet të konfirmohet nga ana e Senatit amerikan.

Në qershor të vitit 2018, ish-presidenti i Kosovës, Hashim Thaçi e dekoroi diplomatin Hovenier me Medaljen Presidenciale Jubilare të Dhjetëvjetorit të Pavarësisë.

Ndërsa diplomati amerikan, Jeffrey Hovenier, deklaroi se qëndrimi amerikan gjithmonë ka qenë në përkrahje të lirisë dhe pavarësisë së Kosovës.

LEXONI GJITHASHTU:

• Çështja e dialogut Kosovë-Serbi, Kurti dhe Brnabiç replika në Forumin e Prespës
• Kurti në Forumin e Prespës tha se Minishengeni Ballkanik nuk ka vizion për rajonin
• 100 ditët e para të qeverisë Kurti, analistët kritikë ndaj qeverisjes së kryeministrit