Apeli shtyn vendimin për ish-kryeprokurorin Adriatik Llalla

Gjykata e Posaçme të Apelit ka shtyrë për më 22 shtator vendimin për ankimin e ish-prokurorit të përgjithshëm, Adriatik Llalla i cili kundërshton vendimin e shkallës së parë të kësaj gjykate.

Kjo e fundit pranoi kërkesën e SPAK për të dënuar ish-prokurorin e përgjithshëm me 2 vite burg si dhe përjashtim për 5 vite nga funksionet publike me akuzën e fshehjes së pasurisë.

Avokati i Llallës deklaroi gjatë seancës së sotme se mungesa në seancë e ish-prokurorit të përgjithshëm vjen pasi ky i fundit është në spital duke qenë se vuan nga një sëmundje e pashërueshme. Sipas tij gjendja shëndetësore e ish-zyrtarit të lartë është e renduar, prandaj ai nuk është prezent.

Por kërkesa e avokateve për të administruar aktet e ekspertimit është rrëzuar nga Gjykata e Posaçme e Apelit.

Aktet e ekspertimet e paraqitura nga avokati i Llallës janë: Akt ekspertimi lidhur me gjendjen shëndetësore të ish-prokurorit i cili sipas tij vuan nga një sëmundje e pashërueshme; disa fatura bankare që sipas avokateve vërtetojnë mbulimin e shpenzimeve të lindjes së djalit; akt ekspertimi për vlerën e banesës.

Katër muaj më parë Gjykata e Posaçme shpalli fajtor ish-kryeprokurorin Adriatik Llalla për fshehje të pasurisë, vendim që u ankimua në Apel nga ish-kryeprokurori.

Gjyqtarja Daniela Shirka dënoi me 2 vite burg ish-kryeprokurorin dhe i hoqi drejtën e ushtrimit të funksioneve publike për një periudhë 5-vjeçare.

Llalla u shpall fajtor edhe lidhur me shpenzimet për lindjen djalit të tij në Shtetet e Bashkuara të Amerikës, një kosto kjo prej 7 mijë dollarësh.

Ish-kryeprokurorit i janë sekuestruar edhe 4 sipërfaqe toke në periferi të Tiranës si dhe një apartament në Durrës, të cilat do të kalojnë në pronësi të shtetit.

LEXONI GJITHASHTU:

• Llalla ankimoi vendimin me dy vite burg, caktohet seanca në apelin e GJKKO
• Vendimi i GJKKO-së: Tre episodet ku ish-kryeprokurori Adriatik Llalla fshehu pasurinë