Arabia Saudite dhe SHBA në gatishmëri pas paralajmërimit për një sulm nga Irani

Shërbimet e inteligjencës në Arabinë Saudite kanë paralajmëruar për një sulm të mundshëm iranian ndaj objektivave në mbretëri.

Kjo është arsyeja pse ushtria amerikane dhe ushtritë e tjera në Lindjen e Mesme janë në gatishmëri të lartë, thanë zyrtarët sauditë dhe amerikanë.

Si përgjigje ndaj paralajmërimit të inteligjencës, Arabia Saudite, Shtetet e Bashkuara dhe disa vende të tjera ngritën nivelin e gatishmërisë së forcave të tyre ushtarake, u njoftua pa dhënë detaje të mëtejshme, raporton The Wall Street Journal.

Zyrtarët sauditë kanë thënë se Irani është gati të nisë sulme ndaj atij vendi, si dhe ndaj Erbilit në Irak, të gjitha në një përpjekje për të larguar vëmendjen nga protestat që kanë tronditur Iranin që nga shtatori.

Këshilli i Sigurisë Kombëtare i Shtëpisë së Bardhë tha se ishte i shqetësuar nga paralajmërimi dhe ishte i përgatitur të përgjigjej nëse Irani fillon një sulm.

“Ne jemi të shqetësuar dhe mbetemi në kontakt të vazhdueshëm përmes kanaleve ushtarake dhe inteligjente me sauditët. Nuk do të ngurrojmë të veprojmë në mbrojtje të interesave dhe partnerëve tanë në rajon”, tha zëdhënësi i Këshillit të Sigurisë Kombëtare.

Irani ka sulmuar tashmë Irakun verior me dhjetëra raketa balistike dhe dronë në muajt e kaluar. Madje, një avion ushtarak amerikan rrëzoi një dron që po shkonte drejt Erbilit, ku janë vendosur trupat amerikane

LEXONI GJITHASHTU:

• Irani shpall gjykime publike për rreth 1 mijë persona
• 8 mijë sulme ajrore në Ukrainë, Kievi frikë nga dronët iranianë