Arben Ratkoceri: Ka konsensus mes vendeve të BE-së për Shqipërinë, mund të shkëputet nga RMV-ja

Analisti Arben Ratkoceri, në një lidhje të drejtpërdrejtë me Euronews Albania foli për mundësinë e Shqipërisë për t’u shkëputur nga Maqedonia e Veriut në rrugën drejt Bashkimit Evropian dhe pengesat që po has RMV-ja për shkak të Bullgarisë.

Z. Ratkoceri tha se për Maqedoninë e Veriut nuk do të ishte mirë të shkëputej nga Shqipëria, për t’u futur në radhë me Kosovën dhe Bosnje Hercegovinën, mirëpo nëse Bullgaria do të mbetet pengesë, atëherë Shqipëria mund të ecë përpara, meqenëse ka një konsensus mes vendeve të BE-së që Shqipëria të marrë pjesë në Konferencën e Parë Ndërqeveritare.

“Futja me një thes e Maqedonisë me Kosovën dhe Bosnje Hercegovinën, shtete që kanë probleme serioze, sidomos me Serbinë, insistohet në çdo formë që RMV-ja të mos shkëputet nga Shqipëria. Por, mund të ndodhë që të shkëputet, pasi ka një konsensus mes vendeve të BE-së për Shqipërinë, duke përfshirë edhe Bullgarinë”, u shpreh z. Ratkoceri.

Arben Ratkoceri tha se qëndrimet politike, akademike dhe qytetare bullgare janë një problem i cili po komplikohet më shumë dhe shpresat që ky problem të zgjidhet shpejt, janë të pakta.

“Qëndrimi bullgar është betonuar, mund të quhet qëndrim shtetëror dhe është e vështirë që situata të përmirësohet brenda një periudhe të shkurtër”, u shpreh z. Ratkoceri.

Sipas analistit nga RMV-ja, fakti që Bullgaria do të futet në zgjedhje nuk përbën ndonjë ndryshim, pasi nuk ka dallim të madh mes qarqeve politike të Bullgarisë rreth kontekstit të Maqedonisë së Veriut.

“Situatën e komplikojnë edhe komisionet e ekspertëve që janë të formuar nga këto dy shtete, lëvizja e të cilëve që prej vitesh që mbajnë takime, është shumë minore”, shtoi ai, duke theksuar se konteksti mes RMV-së dhe Bullgarisë, është më i vështirë se i RMV-së me Greqinë, pasi ka të bëjë me njohjen e identitetit të Maqedonisë së veriut nga pala bullgare.

Shqipëria nuk arriti dot të merrte një datë për negociatat me Bashkimin Evropian nën Presidencën e Portugalisë dhe tani sytë janë drejtuar te Sllovenia, e cila pritet të marrë drejtimin e Presidencës së Bashkimit Evropian.

Arben Ratkoceri tha se ekzistojnë shpresa që Sllovenia të mbajë një qëndrim në të mirë të RMV-së, meqenëse marrëdhëniet mes dy shteteve janë të mira.

LEXONI GJITHASHTU:

• Nuk hapen negociatat, Çika: Ndarja e Shqipërisë nga RMV e vetmja zgjidhje, secili të vlerësohet sipas meritës
• Paketa Shqipëri-RMV në BE, Mimi Kodheli nga Shkupi: Nuk do të bëjmë presion për ndarje
• S’ka datë për negociatat, vetoja e Bullgarisë për RMV bllokon edhe Shqipërinë