Gjykata e Arbitrazhit Sportiv ka vendosur të heqë pezullimin e vendosur nga Federata Ndërkombëtare e Futbollit (FIFA) ndaj Partizanit për sesionin e transferimeve të lojtarëve duke bërë që të kuqtë të rifitojnë të drejtën për të afruar lojtarë gjatë muajit janar.

Vendimi është njoftuar nga klubi 16 herë kampion i Shqipërisë përmes një postimi në Facebook në të cilin theksohej se ai “është paraprak”.

Tashmë pritet “zbardhja e plotë dhe përfundimtare” e vendimit, për të kuptuar hapat e mëtejshëm që do të ndërmerren në lidhje me këtë çështje.

Në muajin gusht të vitit të shkuar, Partizanit iu pezullua e drejta për të operuar në sesionin e transferimeve për dy sezone.

Vendimi i FIFA-s lidhej me rastin e transferimit të Eraldo Çinarit në vitin 2018, transferim që u kalua me polemika dhe masa disiplinore nga Federata Evropiane e Futbollit (UEFA), pasi u konsiderua i parregullt.

Klubi kroat i Istras, që e kishte huazuar Çinarin për një vit nga klubi spanjoll i Alaves ngriti pretendime se futbollisti kishte anashkaluar një parakontratë me ta përpara se të prezantohej si futbollist i Partizanit. FIFA e gjobiti futbollistin me 83 mijë euro ndërsa e konsideroi klubin kryeqytetas si palë në çështje duke i pezulluar edhe merkaton.

Lexoni gjithashtu:

Tjetër gjobë nga FIFA, Partizani dhe Erald Çinari duhet të paguajnë 83 mijë euro