Arbjan Mazniku: Pjesa më e madhe të votave të pavlefshme janë të PS-së

Krahas rezultatit që prodhoi gara elektorale e 25 prillit, treguesi që u pa si problematikë ishte numri i votave të pavlefshme.

Nënkryetari i Bashkisë së Tiranës, Arbjan Mazniku, thotë se shumica e votave të pavlefshme kanë qenë të Partisë Socialiste.

“Pjesa më e madhe  të votave të pavlefshme janë të PS, sepse PS bëri një fushatë të hapur”, tha ai.

I ftuar në “Ilva Now”, z. Mazniku tha se nëse nuk do kishte kaq vota të pavlefshme, Partia Socialistë do kishte 78 deputetë, pra katër më shumë.

“Ne mund të ngremë një hipotezë nëse ka një numër të madh të caktuar votash në Elbasan që kanë 12/8, janë njerëz që kanë dashur të votojnë 12 dhe 8 që ka qenë Taulant Balla, por në vend që të votojnë horizontalisht kanë votuar vertikalisht. Gjëja që mund të themi të siguri është se rezultati i PS do ishte 78 mandate. Do kishim një mandat më shumë në Dibër, Tiranë, Elbasan”, shtoi ai.