Ariu sulmon grupin e nxënësve dhe mësuesve, 11 të plagosur në Kanada

Një ari gri ka sulmuar një grup nxënësish dhe mësuesish në Kanada ku për pasojë janë plagosur 11 prej tyre, dy prej të cilëve ndodhen në gjendje kritike.

Policë të armatosur dhe oficerë të mbrojtjes së natyrës janë në vendngjarje, por sipas komunitetit vendas indigjen Nuxalk Nation, “ariu agresiv” mbetet i lirë.

Banorët janë paralajmëruar nga autoritetet lokale të qëndrojnë brenda dhe të mos dalin për të kërkuar kafshën.

Sulmi ndodhi të enjten pasdite në Bella Coola, British Columbia, rreth 435 milje në veriperëndim të Vankuverit, ndërsa grupi i nxënësve të klasës së katërt dhe të pestë po ecte në një shteg këmbësorësh nën mbikëqyrjen e mësuesve.

Veronica Schooner, djali i së cilës ishte në grup, tha se shumë njerëz u përpoqën të ndalonin sulmin dhe se u përdor sprej kundër arinjve.

Ajo shtoi se një mësues mashkull “mori të gjithë barrën” e sulmit dhe ishte ndër personat që u transportuan me helikopter.

Djali i Veronicas ishte aq afër kafshës sa “madje ia ndjeu qimet”, por kafsha “po ndiqte dikë tjetër”. Schooner tregoi gjithashtu se këpucët e tij ishin të mbuluara me baltë nga vrapimi për siguri, duke shtuar: “ai vazhdon të qajë për miqtë e tij – menjëherë filloi të lutet për miqtë e tij”.

Nxënësit ndjekin shkollën Acwsalcta, një shkollë e pavarur e drejtuar nga Nuxalk First Nation në Bella Coola. Një postim në Facebook njoftoi se shkolla do të mbyllet të premten dhe do të ofrohen këshillime për të prekurit.

Në një deklaratë, shkolla theksoi: “Është e vështirë të dish çfarë të thuash gjatë kësaj kohe shumë të vështirë. Jemi shumë mirënjohës për ekipin dhe nxënësit tanë.”

Po ashtu u njoftua se çdo student do të transportohet në shtëpi me autobus ose SUV.

LEXONI GJITHASHTU:

• FOTO/ Ariu i murrmë shpëtohet nga kurthi në Trebinjë, AKZM: Është në gjendje të mirë
• Trumpin e ndjek ariu në takim me Putin, Zelensky i përgjon! Video me AI në rrjet