Arrest me burg dy të arrestuarve për 143 kilogramë kokainë të sekuestruar në Durrës

Gjykata e Durrësit ka dhënë masën e sigurisë arrest me burg për 2 personat e arrestuar lidhur me sasinë prej 143 kilogramë kokainë të sekuestruar dy ditë më parë në portin e Durrësit.

Pas seancës së zhvilluar me dyer të mbyllura gjyqtarja Eda Kaja vendosi të lërë në burg pa afat Erion Petin dhe Klajdi Xibrakun, që të dy lindur dhe banues në Tiranë,  me arsim të lartë, të pa dënuar më parë.

Të arrestuarit janë shprehu para gjykatës se nuk kanë lidhje me drogën e gjetur brenda kontejnerit me banane të porositur nga kompania që menaxhohet prej tyre.

Dyqind pako kokainë, me peshë 143 kilogramë ishin fshehur në një kontejner me banane që vinte nga Ekuadori e porositur nga kompania Massabi Fruits, e cila rezulton në emër të Klajdi Xibrakut dhe Erion Petit.

Burime policore bëjnë me dije se itinerari i kontejnerit brenda të cilit u gjet lënda narkotike ka qenë Ekuador-Sicili ( Gioia Tower)- Durrës.

Pronarët e kompanisë kanë qenë në vëzhgim më herët pasi policia ka pasur dyshime për aktivitetin e dyshimtë, por nuk kishin arritur të verifikonin asgjë.