“Arrest me burg pa afat” për dy të plagosurit e ngjarjes së Velipojës

Gjykata e Shkodrës ka caktuar masën e sigurisë “arrest me burg pa afat” për Hasan Ferracakun dhe Elmilind Dylin, dy personat e plagosur në ngjarjen e Velipojës, ku në total humbën jetën 4 persona.

Seanca është zhvilluar ditën e sotme në Spitalin e Traumës në Tiranë për shkak të gjendjes së vështirë shëndetësore të të plagosurve.

Gjatë seancës, pala mbrojtëse kërkoi masë më të butë për 17-vjeçarin Elmilind Dyli, për shkak të moshës, por nuk u pranua nga gjykatësi Besmir Stroka.

Ndërkohë dy të plagosurit nuk kanë dhënë deklarime para trupës gjykuese.

Mbi dy të arrestuarit rëndojnë veprat penale “Vrasja në rrethana të tjera cilësuese, kundër dy ose më shumë personave” dhe “Prodhimi dhe mbajtja pa leje e armëve luftarake dhe municionit”, në bashkëpunim.

Ngjarja e rëndë ndodhi në orët e para të mëngjesit të 27 qershorit në Pulaj Plazh të Velipojës, ku mbetën të vrarë: Kujtim Ferracaku, Xhovani Gocaj, Edmond Gocaj dhe Musaen Zeneli.

Shkak i kësaj ngjarjeje u bë konflikti mes dy familjeve Ferracaku dhe Gocaj për vendosjen e shezlongëve në vijën bregdetare.

LEXONI GJITHASHTU:

• Katër armë zjarri janë përdorur në vrasjen e katërfishtë në Velipojë
• “Mos i ndodhtë askujt”, babai i vëllezërve të vrarë në Velipojë tregon se sherri nisi për shezlongët
• 4 të vrarë e 2 të plagosur pas një përplasje me armë në Velipojë