Arrestimi i bosit të ‘Telegram’, protestë në Moskë para ambasadës franceze

Disa protestues u mblodhën jashtë selisë së Ambasadës franceze në Moskë për të kërkuar lirimin e themeluesit të rrjetit “Telegram”, Pavel Durov, që u arrestua të shtunën në Francë.

Një manifestues mbajti një parullë ku i bënte thirrje francezëve të mos ndiqnin hapat e Putin, por të respektonin lirinë e shprehjes. Më vonë ai u arrestua nga policia.

Aktivistët në Rusi janë përpjekur të shmangin ndalimin e protestave të paautorizuara duke mbajtur tubime qoftë edhe me një person, por këto veprime janë të dënueshme me gjobë ose 15 ditë burg.

I lindur në Rusi, Durov u arrestua pasi zbriti me xhetin e tij privat në një aeroport jashtë Parisit, pas një hetimi mbi mungesën e kontrolleve në “Telegram”.

Policia dyshon se rrjeti lejon që në të të kryhen aktivitete kriminale si trafik droge dhe rrjete pedofilie pa i penguar ato.

Sidoqoftë, “Telegram” është kthyer në një nga platformat sociale lider, duke u rreshtuar përkrah gjigantëve si Facebook, Youtube, WhatsApp dhe Instagram.

Por ai nuk përmbush kërkesat e Bashkimit Evropian, gjë që ka çuar në ndalimin e tij në disa shtete anëtare si Spanja.

LEXONI GJITHASHTU:

• Moska merr në mbrojtje Vuçiç: Perëndimi po destabilizon Serbinë
• Ukraina merr në zotërim 600 km2 brenda Rusisë, Moska aktivizon masat e terrorizmit