Arrestimi i Hysni Gucatit, Ramush Haradinaj dënon bastisjen e zyrave të veteranëve të UÇK-së

Pas arrestimit të kryetarit të Organizatës së Veteranëve të Luftës së UÇK-së, Hysni Gucati, ka reaguar ish-kryeministri i Kosovës, Ramush Haradinaj.

Kreu i AAK-së ka ritheksuar qëndrimin e tij rreth asaj se publikimi i dosjeve të Gjykatës Speciale ka qenë i gabuar dhe se do të dëmtojë më së shumti shtetin e Kosovës përfshirë edhe vetë të akuzuarit.

“Të nderuar qytetarë, E ritheksoj qëndrimin tim, se publikimi i dosjeve të Gjykatës Speciale ka qenë i gabuar dhe se do e dëmtojë më së shumti shtetin tonë, përfshirë edhe vet të akuzuarit. Tentimi për të krijuar imazhin se Kosova është e mobilizuar ta pengojë drejtësinë është i gabuar. Ne nuk kemi qenë e as nuk jemi në anën e kundërt të drejtësisë”, shkruan ai,

Ai thotë se asnjë i akuzuar nuk do t’i shmanget drejtësisë, dhe për këtë arsye ai shpreh rezerva për operacionet apo bastisjet e kryera sot në zyrat e OVL-UÇK-së.

“Apeloj te organet e drejtësisë, vendore dhe ndërkombëtare, që të respektojnë të drejtat e të gjithëve. Asnjë i akuzuar nuk do t’i ik drejtësisë. Konsideroj se nuk ka arsye për operacione e bastisje, sepse secili do t’i përgjigjet vullnetarisht drejtësisë. Kosova është gjithmonë me ligjin dhe me viktimat, sepse vetë ishte viktimë e padrejtësive”, shkruan Haradinaj.

Lexoni gjithashtu:

EULEX arreston kreun e veteranëve të UÇK

Hysni Gucati: Do të bindim opinionin publik se Gjykata Speciale bashkëpunon me Serbinë

Gjykata Speciale konfirmon arrestimin e ish-zyrtarit të FSK, Salih Mustafa