“PS nuk është mbulesa e askujt”, kryeministri Rama reagon pas arrestimit të kryebashkiakut të Lushnjës

“Partia Socialiste u shërben zgjedhësve dhe jo të zgjedhurve”. Ky ishte reagimi i kryeministrit Edi Rama, pas lajmit të arrestimit të kryetarit të Bashkisë së Lushnjës, Fatos Tushe, i cili akuzohet për “shpërdorim detyre në bashkëpunim”.

Përmes një postimi në rrjetin social ‘Twitter’ kreu i qeverisë, njëkohësisht kryetar i PS, shprehet se “kryetari i Bashkisë së Lushnjës dhe cilido tjetër i akuzuar nga drejtësia në këtë rast apo në çdo rast, nuk do të ketë asnjë mbrojtje nga Partia Socialiste e duhet të përgjigjen vetë para drejtësisë, me avokatët e tyre e me gojën e tyre”.

“Çdo zgjedhës duhet ta dijë se besnikëria jonë ndaj tij nuk varet nga asnjë individ, po është flamur beteje i PS për ta bërë Shqipërinë të ardhmen tonë dhe çdo i zgjedhur nuk duhet ta harrojë se flamuri i PS s’mund të bëhet mbulesa e askujt, për asnjë interes apo faj vetjak”, shkruan kryeministri në Twitter.

Kryetari i Bashkisë së Lushnjës, Fatos Tushe u arrestua nga policia ditën e sotme.

Burime për Euronews Albania bëjnë me dije se Tushe u arrestua gjatë një operacioni të ndërmarrë me urdhër të SPAK, ku në pranga kanë rënë edhe 10 zyrtarë dhe ish-zyrtarë.

Gazetari i Euronews Albania, Eni Ferhati raportoi se hetimi nga SPAK ka nisur disa muaj më parë për një tender të kanalizimeve, ku dyshohet se është abuzuar me fondet publike.

LEXONI GJITHASHTU:

• Arrestohet kryetari i Bashkisë së Lushnjës, Fatos Tushe
• Operacion ndërkombëtar antidrogë, arrestohet prokurori i Vlorës dhe shefi i Sektorit kundër Trafiqeve