Arrestohen 7 persona në një operacion anti-drogë në Tiranë

Shtatë persona janë arrestuar pas një aksioni të Policisë së Shtetit në Tiranë, ku edhe është konstatuar se një lokal që punonte pas orës policore, ishte bërë vatër e konsumimit dhe shitjes së drogës.

Policia bën të ditur se u shpallën në kërkim dy shtetas dhe u procedua në gjendje të lirë një 32-vjeçar për veprën penale “Moskallzim i krimit” (staf i lokalit).

“Në operacioni policor ‘Klientët’, Seksioni për Hetimin e Narkotikëve në bashkëpunim me Forcën e Posaçme ‘Shqiponja’ në bazë të informacioneve të marra në rrugë operative se një lokal në rrugën ‘Gjin Bue Shpata’, qëndronte i hapur pas orës policore dhe ishte përshtatur si ambient për përdorim dhe shitje të lëndëve narkotike, kanë organizuar dhe finalizuar operacion policor të koduar ‘Klientët’ në kuadër të të cilit bënë arrestimin në flagrancë të (7) shtetasve”, thuhet në njoftimin e Policisë.

Njoftimi thotë se “nga veprimet hetimore ka rezultuar se lokali punonte 3 ditë të javës në kundërshtim të aktit normativ, pas orës së lejuar policore si dhe në bashkëpunim dhe me stafin e këtij lokali kryenin aktivitetin e kundërligjshëm të përdorimit dhe shitjes së lëndëve narkotike”.

Gjatë kontrollit të ambientit, shërbimet e Policisë gjetën dhe sekuestruan një sasi dozash me lëndë narkotike kokainë, e ndarë në doza.