Arrestohen për korrupsion përgjegjësja dhe një specialist i Agjencisë së Barnave

Përgjegjësja dhe një specialist i Agjencisë së Barnave, janë arrestuar nga policia e Tiranës pasi shpërdoruan detyrën dhe morën para, për të mos raportuar shkeljet që kryheshin nga subjektet farmaceutike ku ata ushtronin kontroll.

Policia e kryeqytetit bën me dije gjithashtu është shpallur në kërkim edhe një person tjetër, specialist i kësaj agjencie, i cili akuzohet në lidhje me të njëjtën vepër penale.

Materialet procedurale në ngarkim të tyre i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.

“Si rezultat i këtij operacioni, u vunë në pranga shtetasit:

– Besiana Xhelilaj, 38 vjeçe, banuese  në Tiranë, përgjegjëse e Agjencisë së Barnave;

– Luan Çiçi, 35 vjeç, banues në Tiranë, specialist i Agjencisë së Barnave.

Gjithashtu, në vijim të veprimeve hetimore-procedurale për këtë rast, u shpall në kërkim shtetasi A. L., 28 vjeç, specialist i Agjencisë së Barnave.

Nga veprimet hetimore të kryera në kuadër të operacionit “Farmacisti”, ka rezultuar se këta shtetas, në cilësinë e punonjësve të Agjencisë së Barnave, ushtronin kontrolle në subjekte të ndryshme farmaceutike dhe duke shpërdoruar detyrën, merrnin shuma parash, për të mos raportuar shkeljet ligjore që kryheshin nga këto subjekte”, thuhet në njoftimin e policisë.