Arrestohet banda e vilave, 5 persona grabisnin para dhe sende me vlerë nëpër shtëpi

Një grup grabitësish, të cilët ishin bërë tmerri i shtëpive në disa zona periferike të Tiranës, ranë në prangat e policisë. 5 persona janë arrestuar për vjedhje dhe grabitje me dhunë të banesave dhe vilave, kryesisht në zonë e Saukut dhe Liqenit të Thatë.

Ata fillimisht piketonin banesa ku kishte shuma parash dhe bizhuteri dhe më pas organizonin vjedhjen e tyre. Arrestimi i 5 hajdutëve ndodhi kur ata sapo kishin bastisur një shtëpi pranë qendrës tregtare TEG.

Veç sendeve të vjedhura, policia u sekuestroi atyre edhe armë zjarri, radio marrëse-dhënëse si ato të policisë dhe telefona celularë. Ndërsa mes sendeve të grabitura kishte bizhuteri të ndryshme floriri, si unaza, vathë, ora dore, varëse, medaljonë si dhe pajisje të tjera që shërbejnë për hapjen e bravave dhe dyerve të blinduara.