Arrestohet i dyshuari për vrasjen e ish-kryeministrit japonez, Shinzo Abe

Autoritetet në Japoni kanë arrestuar një të dyshuar për vrasjen e ish-kryeministrit të vendit, Shinzo Abe.

I dyshuar është 41-vjeçari Tetsuya Yamagami, i cili u kap nga policia pranë vendit të ngjarjes, shkruan BBC.

Oficerët e policisë thonë  Yamagami, pranoi se kishte qëlluar ndaj ish-kryeministrit. Ai u tha oficerëve se kishte përdorur një armë të bërë nga ai vetë.

Në një konferencë për shtyp, policia japoneze bëri me dije se në lidhje me vrasjen e Abes, është ngritur një grup hetimor prej 90 personash.

Vrasja e ish-kryeministrit Shinzo Abe në orët e para të mëngjesit të së premtes teksa po zhvillonte një fushatë në qytetin Nara tronditi Japoninë, por edhe politikën në të gjithë botën.

67-vjeçari ndërroi jetë në spital, pasi u qëllua dy herë në shpinë. Ai cilësohej një nga politikanët me më shumë influencë në kohët moderne. Shinzo Abe është kryeministri që ka shërbyer më gjatë në këtë detyrë.

Ai e rimori qeverisjen në vitin 2012 dhe qëndroi deri në vitin 2020 kur dha dorëheqjen për shkak të problemeve shëndetësore.

Pas lajmit të vrasjes së ish-kryeministrit, liderë botërorë reaguan duke dënuar aktin e duke vlerësuar figurën e Shinzo Abe si një personalitet në botën e politikës.

LEXONI GJITHASHTU

• Kush ishte Shinzo Abe, kryeministri japonez që qëndroi më gjatë në pushtet
• Vritet gjatë një atentati me armë ish-kryeministri japonez
• VIDEO| Atentat ish-kryeministrit japonez