Auditimi i KLSH për sitet arkeologjike: Ministria e Kulturës nuk ka politika zhvillimi

Parqet Arkeologjike të Apolonisë, Bylist, Amantias dhe Orikumit nuk kanë ende një plan mbrojtjeje dhe menaxhimi.

Përveç Parkut Arkeologjik të Butrintit dhe Apolonisë të cilët ruhen me roje private, Parku i Bylisit, Amantias dhe Orikumit nuk kane asnjë punonjës për ruajtjen e tyre.

Këto janë vetëm disa nga përfundimet që Kontrolli i Lartë i Shtetit ka nxjerrë pas auditimit për sitet arkeologjike, ku i adreson Ministrisë së Kulturës shumë detyra të pakryera.

Edhe pse Apolonia është në listën e siteve të mbrojtura, vitin e shkuar nuk i shpëtoi dot sulmeve. Dy kolona u dëmtuan, duke treguar se kërcënimet janë reale.

Edhe pse thirrjet nga studiues e arkeologë kanë qenë të shumta për të investuar në gërmime, mirëmbajtje, ruajtje, dhe restaurim, duket se mungesa e kuadrit rregullator po kthehet në kërcënim për historinë.

Të dhënat në pesë vitet e fundit tregojnë se numri i vizitorëve, në sitet arkeologjike është rritur, çka do të thotë më shumë të ardhura nga turizmi kulturor, por duket se mungesa e investimeve dhe promovimi i tyre ka ngelur përsëri shumë hapa mbrapa.

Ndër të tjera, KLSH shkruan se, një potencial i madh objektesh të trashëgimisë kulturore janë ende të pa gërmuara, dhe Parqet Arkeologjike Bylis, Amantia dhe Orikum nuk kanë ndriçim dhe nuk janë të mbuluara me ruajtje fizike.

Ndër të tjera, në mesazhin e auditimit theksohej se punonjësit e koordinimit të këtyre parqeve punojnë pa një plan me masa konkrete.

Analiza po ashtu përmban mungesa të tjera siç është ajo e guidave, e ndër të tjera ajo përmban edhe një sërë propozimesh të cilat duhet të përmbushen. 

LEXONI GJITHASHTU

• Zbulime arkeologjike në Tiranë, gjenden mbetje të reja pranë mozaikut te “21 Dhjetori”
• Rihapet zona arkeologjike e Pompeit, numri ditor i vizitorëve është i kufizuar në 100
• KE miraton fondet për rindërtimin në Shqipëri, 100 mln euro për shkollat dhe objektet arkeologjike