Australia do të hapë kufijtë për udhëtarët ndërkombëtarë që janë vaksinuar me dy doza në fund të shkurtit, njoftoi kryeministri australian Scott Morrison të hënën.

Australia ka qenë e mbyllur për shumicën e udhëtarëve që nga fillimi i vitit 2020.

Në nëntor të vitit 2021, ky vend lehtësoi masat e udhëtimit me Zelandën e Re, Singaporin, Korenë e Jugut dhe Japoninë.

Deri tani, banorët e përhershëm dhe familjet të tyre, së bashku me studentë ndërkombëtarë dhe emigrantë që punojnë atje lejohen të hyjnë në vend me dy doza të një vaksine kundër COVID, të miratuar në vend.

I njëjti rregull do të vlejë edhe për turistët nga fundi i shkurtit.

Australia i ka miratuar të gjitha vaksinat anti-COVID që janë aprovuar nga Organizata Botërore e Shëndetësisë, përkatësisht AstraZeneca, Pfizer, Moderna, Sinovac, Coronavac, Johnson & Johnson.

Australia ka konfirmuar deri më tani 2,727,260 infektime dhe 4,200 vdekje nga COVID-19.

Aktualisht, rreth 80% e të rriturve në vend janë plotësisht të vaksinuar.