Autobusi në flakë pas aksidentit në Turqi! 8 të vdekur dhe 33 të plagosur, mes viktimave edhe një foshnje

Një aksident i rëndë është regjistruar në Turqinë perëndimore kur një autobus u përplas dhe shpërtheu në flakë të dielën në mëngjes. Nga kjo ngjarje kanë humbur jetën tetë persona, përfshirë një djalë 9-muajsh.

Midis të vdekurve ishin babai i foshnjës dhe shoferi 50-vjeçar, ndërsa pati edhe 33 të plagosur. Mediat lokale raportuan se automjeti u përplas me kangjellat mbrojtëse në provincën Denizli ndërsa transportonte 38 pasagjerë dhe tre anëtarë të stafit nga Izmiri në Antalia.

E shtuna ishte dita e fundit e Kurban Bajramit. Festa fetare zakonisht shoqërohet me një rritje të aksidenteve rrugore në të gjithë Turqinë, pasi njerëzit udhëtojnë për të vizituar familjen dhe për të shkuar me pushime.