Autobusi përplaset me kamionin, 79 të vdekur në Afganistan

Të paktën 79 persona, përfshirë 17 fëmijë, u vranë në një aksident rrugor në një autostradë në Afganistanin perëndimor mbrëmë, thanë autoritetet.

Siç konfirmoi kreu i departamentit të informacionit të qeverisë provinciale të Heratit, Ahmadullah Mutaki, në aksident u përfshinë një autobus, një kamion dhe një motoçikletë, raportoi Reuters.

Një autobus që transportonte refugjatë afganë të deportuar nga Irani në Kabul u përfshi nga flakët pas një përplasjeje.

Zëdhënësi i Ministrisë së Brendshme, Abdul Matin Kaniyeh, tha se aksidenti ndodhi rreth 30 minuta larg me makinë nga Herati dhe se të gjithë të vrarët ishin pasagjerë në autobus.

Pamjet nga vendi i ngjarjes tregojnë automjetin në flakë.

Zyrtarët thanë se aksidente të tilla janë të zakonshme në Afganistan për shkak të infrastrukturës së dobët rrugore, mungesës së respektit për rregulloret e trafikut dhe pasojave të dekadave të luftës.

Zëdhënësi i qeverisë talebane, Zabihullah Mujahid, u bëri thirrje institucioneve përkatëse të transportit që të publikojnë urgjentisht rezultatet e hetimit dhe të përcaktojnë përgjegjësit për aksidentin.

LEXONI GJITHASHTU:

• Moska pranon regjimin e talebanëve si autoritet qeverisës të Afganistanit
• Bota reagon pas ekzekutimeve publike në stadiume në Afganistan