Përfaqësuesit ligjorë të presidentit Ilir Meta kanë kërkuar përjashtimin e trupës që po shqyrton shkarkimin e tij në Gjykatën Kushtetuese, me argumentin se nuk mund të jenë të paanshëm.

Sipas avokatit Bledar Dervishajt, tre anëtarë të Gjykatës Kushtetuese: Vitore Tusha, Përparim Kalo dhe Fiona Papajorgji duhet të japin dorëheqjen nga shqyrtimi i kësaj çështjeje pasi kanë konflikt interesi.

Dervishaj tha se kryetarja e gjykatës Kushtetuese është në detyrë 5 vite përtej mandatit të saj, ndërkohë që gjyqtari Përparimin Kalo relator është caktuar pa short që është në shkelje të kushtetutës.

“Anëtarja e Gjykatës Kushtetuese nuk mund të qëndrojë kaq shumë përtej mandatit, pasi krijon një situatë të palogjikshme dhe konsumon gjysmën e mandatit të anëtarit tjetër”, tha përfaqësuesi ligjor i Metës.

Në këto kushte sipas Dervishajt, kjo trupë nuk mund të gjykojë me paanshmëri këtë çështje.

“Presidenti ka humbur gjithë besimin në këtë trupë gjyqësore”, tha Dervishaj.

Përfaqësuesja e mazhorancës Klotilda Bushka i ka kërkuar gjykatës të rrëzojë kërkesën për përjashtimin e trupës gjykuese nga shqyrtimi i çështjes, duke e cilësuar analizën e avokatit të Metës hipotetike.

Gjykata kushtetuese është tërhequr për të shqyrtuar kërkesën e përfaqësuesve ligjorë të presidentit Meta për dorëheqjen e trupës gjykuese.

Presidenti Meta ka refuzuar të jetë i pranishëm në seancë dhe përfaqësohet nga avokatët Kaltrina Treska dhe Bledar Dervishaj.

LEXONI GJITHASHTU:

Kushtetuesja nis shqyrtimin për shkarkimin e Metës