Avokati i kontrollorëve: Çështja e ngritur nga prokuroria fut ujë nga të gjitha anët

Tre kontrollorët e “Albcontrol”, të cilët u arrestuan rreth një javë më parë kanë apeluar vendimin e shkallës së parë dhënë ndaj tyre.

Avokati Rezart Kthupi në një intervistë për Euronews Albania këmbënguli se akuzat e ngritura ndaj kontrollorëve nuk qëndrojnë pasi nuk janë konsumuar elementë të veprës penale. Ai thotë se i ka kërkuar Gjykatës së Apelit arrestimin e tyre ta cilësojë si të paligjshëm.

“E para e punës ne kërkojmë nga Gjykata e Apelit që të çmontohet e gjithë çështja penale që është ngritur. Në gjykimin tonë, akuzat që i drejtohet kontrollorëve nuk qëndron, sepse nuk jemi në kushtet e një vepre penale. Kemi kërkuar nga gjykata e Apelit të cilësohet i paligjshëm arrestimi i tyre”, tha ai.

Avokati shprehet se kontrollorët duhet të lihen të lirë pasi nuk i lidh asgjë me akuzat.

“Këtë tre persona duhet të lihen të lirë dhe nuk është çështja për një masë sigurimi më të lehtë. Kjo është një akuzë e ngritur dhe e pambështetur në prova. Nuk ka asnjë provë që këta tre kontrollorëve të cilësohen si organizatorë të asaj që u cilësua si pengmarrje dhe grusht shtetit. E gjithë çështja ngritur nga prokuroria fut ujë nga të gjitha anët dhe nuk qëndron fare në këmbë”, tha ai.

Rreth një javë më parë Gjykata e Tiranës, caktoi masën “arrest me burg”, ndaj kontrollorëve Armando Fezga dhe Muhin Mezin, ndërsa Flora Ndreca u la në “arrest shtëpie”.

Lexoni gjithashtu:

Kontrollorët e Albcontrol apelojnë vendimin e “arrestit me burg”