Avokati i Rudolf Nikollit kërkon ndryshimin e masës së sigurisë për klientin e tij

Avokati i Rudolf Nikollit, i arrestuar për “vepra me qëllime terroriste” për sulmin me thikë në xhaminë e “Rrugës së Kavajës” në Tiranë, i kërkon Gjykatës së Apelit për klientin e tij ndryshimin e masës së sigurisë nga “arrest me burg” në “shtrim të përkohshëm në një spital psikiatrik”.

Sipas avokatit, i riu ka probleme të shëndetit mendor dhe nuk ka pasur qëllim të përhapë panik në popullatë.

Avokati thekson se Nikolli që i vogël ka qenë besimtar i fesë myslimane dhe vazhdon të jetë, madje ka frekuentuar dhe xhamitë.

Ndërkohë në deklarimet që i ka marrë policia të riut, ky i fundit ka shfaqur halucinacione duke treguar ngjarje apo fakte jo reale.

Ngjarja e rëndë ndodhi mesditën e 19 prillit në kryeqytet.

Nikolli, 34 vjeç, sulmoi me thikë brenda mjediseve të xhamisë së “Rrugës së Kavajës” pesë besimtarë.

Ai u neutralizua nga qytetarët e zonës dhe më pas u arrestua nga policia.

Lexoni gjithashtu:

Sulmi në xhaminë “Dine Hoxha” në Tiranë, Rudolf Nikolli akuzohet për “akt terrorist”

Mjeku psikiatër për sulmin në xhami: Autori ka nevojë për trajtim dhe jo për izolim