‘Open Balkan’ përplas Ramën me gazetarët nga Kosova në konferencën me Merkel

Diskutimi i gjerë lidhur me Ballkanin e Hapur në konferencën e përbashkët për shtyp me kancelaren gjermane Angela Merkel solli një “përplasje” mes gazetarëve të Kosovës dhe kryeministrit Rama.

Gazetarët e ardhur nga Kosova kërkuan që të bënin pyetje, por sipas protokollit pyetjen ishin ndarë për dy gazetarë nga Shqipëria dhe dy nga Gjermania.

Kjo solli pakënaqësinë e gazetarëve të mbërritur nga Kosova, të cilët kanë shprehur interesin t’u drejtojnë pyetjet e tyre kancelares gjermane dhe kryeministrit shqiptar.

Gjatë konferencës për mediat me Merkel, shefi i qeverisë shqiptare i bëri thirrje Kosovës të heqë dorë nga teoritë e konspiracionit rreth iniciativës së “Open Balkan”.

“Ne duhet të ecim më shpejt, një nga pengesat ka qenë se Serbia nuk e pranonte lëvizjen e lirë të njerëzve, sepse kishte paragjykimi se nëse ne fusim lëvizjen, atëherë lëvizja e lirë mes Kosovës dhe Serbisë do të ishte garantuar. Dhe faktikisht sot është e pabesueshme që Kosova nuk e shfrytëzon këtë për veten e vet, por rri e bën teori konspiracioni për ‘Open Balkan’. Kaq e thjeshtë është”, tha Rama.