Banka e Shqipërisë cakton tarifat për SEPA-n: S’do jenë më të larta se 3 euro

Komisionet për transfertat e parave nga vendet e Europës do të ulen. Banka e Shqipërisë ka përcaktuar rregulloren dhe tavanet që duhet të aplikojnë bankat për tarifat e reja.

Komisioni minimal që bankat mund të aplikojnë për transfertat në sistemin Euro do të ulet nga 6 euro në 4 euro. Banka e Shqipërisë ka caktuar rregulloren që vendos kufijtë e tarifave që bankat dhe institucionet e pagesave do të aplikojnë pas anëtarësimit në SEPA. Sipas ndryshimeve të propozuara, komisioni minimal që bankat mund të aplikojnë për transfertat në sistemin Euro do të ulet nga 6 euro në 4 euro.

Ndërkohë, totali i komisioneve për çdo transfertë me vlerë deri në 150 mijë euro nuk mund të jetë më i lartë se 0.02% e vlerës së transferuar. Ashtu siç ndodh me transfertat në Lekë, edhe rregullorja për transfertat në Euro do të stimulojë përdorimin e kanaleve elektronike për kryerjen e transfertave, duke parashikuar komisione të përgjysmuara për veprimet që kryhen nëpërmjet këtyre kanaleve.

Komisioni minimal që bankat mund të aplikojnë për transfertat kombëtare në monedhën europiane, të kryera nëpërmjet e-banking, nuk mund të jetë më i lartë se 2 euro. Ndërsa totali i komisioneve për çdo transfertë me vlerë deri në 150 mijë euro nuk mund të jetë më i lartë se 0.01% e vlerës së transferuar.

Ndërkohë, komisionet maksimale që bankat mund të aplikojnë, pavarësisht shumës së transfertës, propozohen të jenë të njëjta si në rregulloren aktuale: përkatësisht 50 euro për transfertat e kryera në degë dhe 25 euro për ato të nisura nëpërmjet kanaleve elektronike.

Këto nivele tavan do të aplikohen edhe për transfertat në nisje në zonën SEPA. Ndërsa, për tarifat e pagesave SEPA hyrëse, nëse aplikohen nga institucioni i përfituesit të pagesës, ato duhet të reflektojnë kostot përkatëse të ofruesit të shërbimeve të pagesave. Këto tarifa, në asnjë rast, nuk mund të kalojnë vlerën 3 euro për transaksion.