Banorët e Zall Gjoçajt protestë para Gjykatës Administrative të Apelit për ndërtimin e HEC-eve

Mëngjesin e kësaj të mërkure, banorët e Zall Gjoçajt po zhvillojnë një protestë para Gjykatës Administrative të Apelit në Tiranë, pasi ky institucion nuk po merr parasysh ankimimet e tyre.

Nëpërmjet kësaj proteste ata kërkojnë që gjykata ta caktojë sa më shpejt datën e shqyrtimit të çështjeve në Apel, për ndalimin e punimeve për ndërtimin e HEC-eve në zonën ku ata banojnë.

Gjykata Administrative e Shkallës së Parë në Tiranë, në nëntor të vitit 2019-të rrëzoi padinë e banorëve të fshatrave Zall Gjoçaj, Gjoçaj dhe Melth në Mat dhe disa organizatave të Shoqërisë Civile, që kërkonin pezullimin e punimeve për ndërtimin e hidrocentralit të Sekës në lumin Zall-Gjoçaj, deri në marrjen e një vendimi mbi themelin e çështjes.

Po kështu, më herët këta banorë, të mbështetur edhe nga aktivistë të Shoqërisë Civile kanë zhvilluar edhe disa protesta, në mënyrë që të mos ketë ndërtime në Parkun Kombëtar të Zall Gjoçajt.

Sipas tyre, ndërtimi i HEC-eve është një skemë korruptive në favor të oligarkëve që do t’i shkaktojë probleme me ujin e pijshëm dhe prishjen e ekosistemit të zonës.