Barack dhe Michelle Obama festojnë 28-vjetorin e vajzës së tyre të madhe, e urojnë me fotot e rralla familjare

Ish-presidenti i SHBA-së, Barack Obama, dhe bashkëshortja e tij, Michelle Obama, festuan 28-vjetorin e vajzës së tyre të madhe, Malia Obama, duke publikuar foto dhe video të rralla familjare në rrjetet sociale.

“Gëzuar ditëlindjen, Malia! Nuk e di se si kalon koha kaq shpejt, por gëzimi që të kam vajzë nuk zbehet kurrë”, shkroi Barack Obama në postimin e tij.

Ai ndau dy fotografi, njëra ku Malia është ende foshnjë dhe ai i lexon librin për fëmijë Goodnight Moon, ndërsa tjetra është një foto e kohëve të fundit, ku Malia e përqafon të atin.

Nga ana e saj, Michelle Obama publikoi në Instagram një video të shoqëruar me këngën “Happy Birthday” të Stevie Wonder, ku shfaqet duke pozuar së bashku me dy vajzat e saj, Malia dhe Sasha Obama.

“Gëzuar ditëlindjen, Malia! Ti sjell kaq shumë dritë dhe energji në botë me gjithçka që bën. Babai yt dhe unë jemi shumë krenarë për gruan që je bërë”, shkroi Michelle.

Malia, e cila në karrierën e saj profesionale përdor emrin Malia Ann, u diplomua në Universitetin e Harvardit në vitin 2021 dhe tashmë punon në Los Anxhelos si skenariste, regjisore dhe krijuese filmash.

Ajo ka qenë pjesë e ekipit të skenaristëve të serialit thriller “Swarm” të Amazon Prime Video në vitin 2023, ndërsa në vitin 2024 prezantoi filmin e saj të shkurtër “The Heart” në Festivalin e Filmit Sundance.

Më 18 qershor, Malia bëri një nga paraqitjet e saj të rralla publike së bashku me prindërit dhe motrën Sasha gjatë inaugurimit të Obama Presidential Center në Çikago.

Barack Obama ka folur shpesh me krenari për dy vajzat e tij, duke thënë se ato janë “më të zgjuara, më qesharake dhe më interesante” se ai ishte në moshën e tyre.

Edhe Michelle Obama u shpreh optimiste për brezin e ri, duke theksuar se Malia, Sasha dhe miliona të rinj të tjerë i japin shpresë për të ardhmen.