Bardhok Pllanaj u ekzekutua me mbi 30 plumba, autorët e ndoqën për 150 metra

Euronews Albania ka mundur të mësojë detaje të reja nga ekzekutimi i Bardhok Pllanajt në Shkodër.

Burimet bëjnë me dije se në drejtim të Bardhok Pllanajt autorët kanë qëlluar me më shumë se 100 plumba, ndërsa në trupin e viktimës janë gjetur mbi 30 të tillë.

Nga këta të fundit kanë rezultuar fatal për jetën e 46-vjeçarit, një  plumb në kokë dhe një në gjoks.

Pllanaj është ndjekur për rreth 100-150 metër nga atentatorët, të cilët dyshohet se i kanë bllokuar rrugën.

Ndërkohë, policia po vijon hetimet për zbardhjen e kësaj ngjarjeje.

Ngjarja ndodhi mbrëmjen e së dielës, rreth orës 21:10, në fshatin Dobraç i Ri, Njësia Administrative Rrethina, ndërsa ende nuk dihen rrethanat të mëtejshme mbi ngjarjen.

Ekzekutimi i 46-vjeçarit ndodhi teksa ai ishte duke udhëtuar me automjet.

Një mjet u gjet i djegur në një distancë të afërt nga vendi i vrasjes tek vendi i quajtur “Stacioni i pompave” në Dobraç, i cili dyshohet të ketë qenë i autorëve.

Bardhok Pllanaj, rezulton se ka qenë person i dënuar në Belgjikë për trafikim të qenieve njerëzore.

Po kështu, ai u hetua edhe për ndërtim pa leje në qytetin e Shkodrës të një pallati me vlerë 2 milionë euro, çështje për të cilën u arrestua në vitin 2018.

Prokuroria e Shkodrës e akuzoi se kishte përdorur para nga aktivitete kriminale për ndërtimin e pallatit me 10 kate.

Sakaq, ai është hetuar së bashku me disa persona të tjerë, si pjesë e grupit të të arrestuarve në kuadër të operacionit “Laguna e Vilunit” në 2014 ku u sekuestruan 804 kg kanabis.

Lexoni gjithashtu:

Ekzekutohet “Kumbari” i Shkodrës, gjenden dy armë në makinë