Basha: Ekonomia në krizë, 97% e shqiptarëve paguajnë më shumë taksa

Kreu i Partisë Demokratike, Lulzim Basha akuzoi qeverinë e kryeministrit Rama se ka zhytur Shqipërinë në krizën më të thellë ekonomike krahasuar me çdo vend tjetër të rajonit.

Basha e bëri deklaratën para gazetarëve disa çaste pas përfundimit të konferencës së kryeministrit Edi Rama për ekonominë, ku kreu i qeverisë mbrojti premtimin elektoral për vendet e punës si dhe masat, sipas tij, lehtësuese të qeverisë për biznesin në 7 vitet e fundit.

Megjithatë, para zgjedhjeve të 25 prillit, partitë politike kanë ndezur motorrët e fushatës dhe ekonomia është një nga çështjet më të nxehta të diskutimit.

Kryedemokrati Basha tha se është koha për ndryshim duke nënkuptuar se PD duhet të jetë triumfuesja e zgjedhjeve.

“Në tetë vite Edi Rama rriti taksat tre miliard euro më shumë. Janë 97% e shqiptarëve që paguajnë më shumë taksa ndërkohë që 40% e të ardhurave të biznesit shkon pikërisht për këto taksa të rritura,” – akuzoi Basha.

“Numri i shqiptarëve që kanë humbur vendin e punës është më i larti në rajon, ndërsa ndihma ekonomike që qeveria Rama ka ofruar është më e ulëta në botë,” – shtoi kryedemokrati.

Lulzim Basha tha në deklaratën e tij për mediat se Partia Demokratike do të ofrojë një plan konkret ekonomik dhe do të mundësojë një klimë pozitive për investimet e huaja.

Lexoni gjtihashtu: 

Kryeministri Rama mbron premtimin elektoral për 300 mijë vende pune

Basha kritika Ramës: Shqipëria ka numrin më të lartë të bizneseve të mbyllura në rajon