Basha në Gjirokastër: Shtëpia e Musine Kokalarit do të restaurohet, subvencione për artizanët

Vizitën e tij në Gjirokastër Lulzim Basha e nisi nga shtëpia e rrënuar e Musine Kokalarit, të cilën, nëse vjen në pushtet Partia Demokratike pas 25 prillit, premtoi ta restaurojë, dhe ta bëjë pjesë të guidave turistike.

Kreu i PD e cilësoi shtëpinë e rrënuar të Musine Kokalarit, të parës grua që drejtoi një parti politike në Shqipërinë e pavarur, si vend “pelegrinazhi për kurajën dhe intelektin e gruas shqiptare”.

“E kemi pjesë kryesore të programit tonë fuqizimin e gruas, pasi pa fuqizimin e gruas shqiptare nuk kemi për të pasur Shqipëri të fortë. Nuk ka sa simbol më të mirë për forcën e gruas shqiptare se sa Musine Kokalari e cila nuk u dorëzua deri në fund” tha z. Basha.

Në pazarin e famshëm të Gjirokastrës ai u takua me qytetarë dhe artizanë, të cilët e njohën me vështirësitë që përballet ky sektor. Kryedemokrati premtoi subvencionë për artizanët, dhe u shpreh se pas 25 prillit, do të punojë për rritjen e numrit të turistëve në qytetin e gurtë.

Pas këtyre premtimeve, edhe gjirokastritët u treguan bujarë me kryedemokratin duke i dhuruar një jelek, të cilin z. Basha nuk hezitoi ta vishte.