Gazetari Ejupi e cilëson pozitiv për dy vendet, bashkëpunimin Shqipëri-Turqi në fushën e mbrojtjes

Gazetari Abdylvehap Ejupi tha për Euronews Albania se bashkëpunimi midis Shqipërisë dhe Turqisë në fushën e mbrojtjes është diçka normale duke qenë se dy vendet janë aleatë rajonalë, por dhe aleatë të NATO-s.

Zgjerimi i buxhetit prej 8.5 milionë euro do të shërbejë për të blerë dronë në Turqi, që siç tha Ejupi, do të vëzhgojnë dhe do të përcjellin informacione të shpejta mbi luftën ndaj krimit dhe ekonomisë së zezë në përgjithësi.

Dronët, sqaroi gazetari, do të jenë të markës “Kargu”, duke qenë se një dron “Baykar TB2”  kushton 6 milionë euro dhe bashkë me armatimet, një njësi e kësaj marke do të kushtojë 35 milionë euro, kosto që Shqipëria nuk e përballon dot dhe as nuk e ka të nevojshme.

Sipas Ejupit, Shqipëria është një liman i sigurt për investitorët e huaj, përfshirë këtu edhe Turqinë për shkak të të dhënave gjeopolitike, ndërsa shkëmbimi mes dy shteteve do të jetë në të mirë të popujve.

Sa i takon marrëdhënies së ngushtë, jo vetëm shtetërore, midis presidentit Erdogan dhe kryeministrit Rama, gazetari tha se kjo ishte diçka që ndodhte dhe me presidentin e Azejrbaxhanit, Pakistanit dhe princin e Katarit.

Sipas tij këto shtete, Turqia i konsideron aleatë të ngushtë dhe mbi to ndërton politikën e jashtme në rajonet përkatëse.

LEXONI GJITHASHTU:

• Erdogan së shpejti në Shqipëri, pas investimeve turke në ekonomi, bashkëpunim në fushën e mbrojtjes
• ”Rama vëlla apo vasal i Erdogan?”, ku ndahen Andi Bushati dhe Baton Haxhiu