Bashkia Vlorë thotë se e ka shkarkuar, drejtori i ujësjellësit vijon punën

Bashkia Vlorë pretendon se ka ndërprerë marrëdhëniet financiare me drejtorin e ujësjellësit, Shkëlqim Leskaj, mirëpo ky i fundit vijon të shkojë normalisht në zyrë.

Leskaj është akuzar nga kryetari i Bashkisë Vlorë, Dritan Leli, se ka shpërdoruar detyrën duke përvetësuar librat e protokollit dhe vulën e institucionit që ai drejton duke firmosur për tenderë të ndryshëm.

Përplasja mes dy zyrtarëve në Vlorë përshkallëzoi ditën e djeshme aq sa përfaqësuesit e dy institucioneve u thirrën në polici.

Por sot situata duket ndryshe. Përmes një shkrese drejtuar mediave, drejtoria e ujësjellësit informoi se Leskaj do të vazhdojë detyrën. Nga Bashkia Vlorë ndërkohë nuk ka pasur koment.

Leskaj këmbëngul se shkarkimi i tij është i paligjshëm pasi ujësjellësi është shoqëri aksionere dhe për shkarkimin e tij vendos vetëm bordi ekzekutiv.