Bashkimi Evropian po përgatitet t’i përgjigjet tarifave të reja të Trump për makinat

Bashkimi Evropian është duke përgatitur një përgjigje ndaj tarifave të reja për importet e makinave të shpallura nga presidenti i SHBA-së, Donald Trump, tha sot Komisioni Evropian (KE).

Zëdhënësi i KE-së, Olof Gill, u tha gazetarëve se BE-së i vjen keq që tarifat e reja të SHBA-së ndaj vendeve anëtare të BE-së do të hyjnë në fuqi javën e ardhshme, duke theksuar se Brukseli po përgatitet për këtë, njoftoi Reuters.

Gill deklaroi se nuk mund të jepte një datë të saktë se kur BE do të vendoste tarifa reciproke ndaj Shteteve të Bashkuara, por tha se mund të jepte garanci se përgjigja do të ishte në kohë dhe e fortë dhe se do të arrinte efektet e synuara.

Mbretëria e Bashkuar nuk dëshiron të përshkallëzojë luftën tregtare me SHBA-në, tha ministrja britanike e financave Rachel Reeves, ndërsa Franca dhe Gjermania po bëjnë thirrje për një përgjigje të fortë të Bashkimit Evropian ndaj tarifave të reja të SHBA që godasin industrinë evropiane të makinave.

“Luftërat tregtare nuk janë të mira për askënd. Ne nuk jemi në një pozicion për momentin për të marrë masa që mund të çojnë në përshkallëzim”, tha Reeves për Sky News, duke iu përgjigjur një pyetjeje nëse Britania do të vendoste tarifa reciproke kundër SHBA.

Nga ana tjetër, ministri gjerman i Ekonomisë, Robert Haber, vlerësoi se vendosja e tarifave për makinat e importuara, të cilën Trump e shpalli të mërkurën, kërkon një përgjigje vendimtare nga BE-ja.

LEXONI GJITHASHTU:

• Trump: Tarifa më të larta për BE dhe Kanadanë nëse bashkëpunojnë në dëm të SHBA
• Trump shpall tarifat 25 për qind për importet e makinave në SHBA