EULEX “rrethon” dy shtëpitë e ish-kryeparlamentarit Jakup Krasniqi

Dy shtëpitë e ish-kryetarit të Kuvendit të Kosovës, Jakup Krasniqit janë rrethuar dhe kontrolluar nga forcat speciale të EULEX–it dhe Policisë së Kosovës, që në orët e para të mëngjesit.

Me dhjetra trupa policore, të armatosur rëndë kanë bllokuar rrugën, duke mos lejuar edhe lëvizjet e familjarëve. Këta të fundit, kanë shprehur shqetësimin e tyre, pasi nuk dinë se çfarë po ndodh.

Megjithatë, dyshimet e tyre bien mbi rolin dhe veprimtarinë që Krasniqi ka pasur në UÇK, gjatë periudhës së luftës.

Mbi operacionin që u zhvillua në Prishtinë, ku ndodhet njëra shtëpi dhe në fshatin Negrovac të komunës Drenas, ku ndodhet shtëpia tjetër, u shpreh edhe Gjykata Speciale, duke komentuar se ky kontroll në banesën e Jakup Krasniqit, është duke u kryer me urdhër të Prokurorit të Zyrës së Specializuar, në bashkëpunim me Policinë e Kosovës dhe EULEX.

Aktualisht Jakup Krasniqi, mban postin e kryetarit të Këshillit Kombëtar të Nismës Social Demokrate. Më parë ai ka qenë i emëruar si ministër i Shërbimeve Publike në Qeverinë e Kosovës, si dhe ka drejtuar Kuvendin e Kosovës nga viti 2007 deri në vitin 2014.

Gjatë periudhës së Luftës, Jakup Krasniqi, ka mbajtur poste të rëndësishme në UÇK, ku ka qenë edhe zëdhënës.