Bayern paguan 45 milionë euro, Sané largohet nga Manchester City

Duke nisur nga sezoni i ardhshëm Leroy Sané do të jetë futbollist i Bayernit të Mynihut. Bavarezët kanë arritur marrëveshjen me Manchester City-in, teksa do të paguajnë 45 milionë euro për shërbimet e lojtarit. 

Sané ka nënshkruar një marrëveshje 5-vjeçare me bavarezët, pasi gjermani refuzoi të nënshkruante marrëveshje të re me skuadrën e Pep Guardiolës.

Sulmuesi i krahut të majtë u soll në Angli në vitin 2016, kur asokohe Guardiola e kërkoi me ngulm nga Schalke 04, klub me të cilin kishte debutuar  duke ardhur nga akademia.

Tridhjetë milionë euro ishte shuma që anglezët paguan asokohe, mirëpo lidhja e fortë e fillimit, trajner-lojtar, nuk zgjati shumë kjo edhe për shkak të lëndimeve.

Pas 135 ndeshjesh ku shënoi 39 gola dhe shërbeu 45 asiste, 24 vjeçari vuajti një lëndim serioz siç është lëndimi i ligamentit kryqëzor të gjurit.

Gjatë këtij sezoni ai u pa vetëm një herë në fushë, saktësisht vetëm 11 minuta kundër Burnley-it një javë më parë.

Në krahun e majtë të sulmit City ka titullar të palëvizshëm Raheem Sterlingun, ndërsa herë pas here ka aktivizuar atje edhe Gabriel Jesusin apo Bernardo Silvan, lojtarë të cilët përgjithësisht luajnë në krahun e djathtë ose në qendër të sulmit.

Edhe te Bayerni Sané duket se do të duhet të punojë shumë për të merituar vendin e titullarit, pasi krahu i majtë atje diskutohet nga dyshja Ivan Perisic dhe Kingsley Coman.

Lexoni gjithashtu:

La Liga dhe Serie-A, Atletico ndal Barcelonën, Juventus rinis marshimin në krye

Clemens Tönnies dorëhiqet si president i Schalke 04

Kupa e Afrikës shtyhet për në vitin 2022, anulohet formati i vajzave