BE-ja njeh certifikatat e vaksinimit kundër COVID-19 të Kosovës

Ministria e Shëndetësisë e Kosovës bëri të ditur se nga data 1 korrik Bashkimi Evropian do të pranojë certifikatat e vaksinimit dhe të testimit të lëshuara nga institucionet e Kosovës për COVID-19, shkruan REL.

“Sekretariati i EU digital Certificate i Komisionit Evropian e ka njoftuar Ministrinë e Shëndetësisë se është konfirmuar pranueshmëria –vendimi mbi ekuivalencën e certifikatës digjitale të vaksinës kundër COVID-19, e lëshuar nga Kosova në EU digital certificate, me qëllim lehtësimin e së drejtës së lëvizjes së lirë brenda shteteve të Bashkimit Evropian”, thuhet në njoftimin e Ministrisë.

Edhe në njoftimin e Zyrës së BE-së, të lëshuar të enjten, thuhet se ky vendim vlen për të gjitha certifikatat e lëshuara “në përputhje me rregulloren e BE-së, të Parlamentit Evropian dhe Këshillit”.

Pas publikimit në gazetën zyrtare të Bashkimit Evropian vendimi hyn në fuqi dhe certifikata digjitale e vaksinimit kundër COVID-19 e Kosovës do të jetë e lexueshme në pikat hyrëse dhe kontrolluese brenda shteteve të Bashkimit Evropian.

LEXONI GJITHASHTU:

• Nga 1 qershori, Italia nuk do të kërkojë certifikatë vaksinimi për udhëtarët
• PE mbështet shtyrjen e certifikatës digjitale të COVID për një vit