Belgjika refuzon zhvillimin e ndeshjes me Izraelin për arsye sigurie

Belgjika nuk do ta zhvillojë ndeshjen e Ligës së Kombeve me Izraelin më 6 shtator për shkak të frikës për sigurinë, njoftoi të martën Federata Belgjike e Futbollit (RBFA).

Qyteti i Brukselit tha muajin e kaluar se ndeshja nuk do të luhej në stadiumin King Baudouin, sepse mund të nxiste demonstrata.

Autoritetet e kishin konsideruar “të pamundur organizimin e kësaj ndeshjeje me rrezikshmëri të lartë” në qytet për shkak të tensioneve të lidhura me luftimet ndërmjet Izraelit dhe grupit ekstremist palestinez Hamas – i shpallur organizatë terroriste nga Shtetet e Bashkuara të Amerikës dhe Bashkimi Evropian.

Qytetet e tjera belge, gjithashtu, refuzuan të organizonin ndeshjen, shkruan REL.

Qyteti pritës nuk është caktuar ende, me Budapestin që përmendet si një opsion.

Shqetësimet me gjasë u ngritën nga sulmi në Bruksel në tetor, ku një i armatosur islamik vrau dy tifozë suedezë të futbollit para ndeshjes kualifikuese të Euro 2024 ndërmjet Belgjikës dhe Suedisë, megjithëse motivi i sulmit nuk ishte antisemitik.

Franca dhe Italia janë në të njëjtin grup A2 të Ligës së Kombeve me Belgjikën dhe Izraelin.

LEXONI GJITHASHTU:

• Prokuroria e Tiranës vë në sekuestro 50 mln € pasuri të 7 të dënuarve në Belgjikë
• Euro 2024| Belgjika surprizohet nga Sllovakia, mposhtet me rezultatin 0-1