Berat Rukiqi nga Oda Ekonomike: Nga qeveria Kurti presim angazhim për vaksinat dhe daljen nga pandemia

Berat Rukiqi, kryetar i Odës Ekonomike në Kosovë, tha për Euronews Albania se sipërmarrjet presin nga qeveria e re e Albin Kurtit angazhim për sigurimin e vaksinave, kjo pasi rimëkëmbja ekonomike e vendit varet seriozisht nga zgjatja e pandemisë.

Në intervistën për edicionin e mëngjesit me gazetaren Esmeralda Mulaj, Rukiqi tha se ende Kurti nuk ka prezantuar një program të qartë të qeverisë dhe se Oda Ekonomike pret që të nisë konsultimet për t’i përcjellë rekomandimet që kanë sipërmarrjet për situatën.

Ai tha se angazhim për një plan të qartë për daljen nga pandemia me plan konkret për sigurimin e vaksinave është pritshmëria kryesore e bizneseve në Kosovë.

“Kthimi sa më shpejt i gjendjes në normalitet është parakusht kryesor për rimëkëmbjen ekonomike,” – theksoi Rukiqi teksa shtoi se sipërmarrjet presin që të kenë edhe përkrahje nga qeveria për të përballuar pasojat që ka shkaktuar pandemia në të bërit biznes.

Rukiqi u shpreh se në kushte të zakonshme kërkesat dhe pritshmëritë do të ishin të tjera, mirëpo ai kujtoi se Kosova krahas krizës shëndetësore ka përjetuar edhe krizë politike.

“Sundimi i ligjit dhe mungesa e stabilitetit politik ka ndikuar tek investimet” – tha Rukiqi duke shtuar se situata kërkon reforma të domosdoshme.