Bernardo Silva- lojtari më i ri i Real Madridit: portugezi ka nënshkruar për Los Blancos

Lajmi që qarkullonte prej ditësh është zyrtarizuar: Bernardo Silva është lojtari më i ri i Real Madridit. Mesfushori portugez ka nënshkruar kontratë me klubin madrilen, duke i dhënë fund aventurës së tij të suksesshme në Premier League me Manchester City.

Sipas raportimeve, transferimi është realizuar si lojtar i lirë, pas përfundimit të kontratës së tij me kampionët anglezë. Silva ka firmosur një marrëveshje dyvjeçare me opsion zgjatjeje edhe për një sezon tjetër, duke u konsideruar një përforcim strategjik për projektin e ri të klubit spanjoll.

Në prapaskenë të këtij operacioni qëndron trajneri José Mourinho, i cili e ka kërkuar me ngulm afrimin e mesfushorit, duke e vlerësuar si një element kyç për kreativitetin dhe kontrollin e lojës në mesfushë. Bindja e lojtarit është arritur edhe falë projektit sportiv të paraqitur nga “Los Blancos”.

Bernardo Silva mbyll kështu një kapitull të artë me Manchester Cityn, ku fitoi trofe të shumtë dhe u kthye në një nga lojtarët më të rëndësishëm të skuadrës së Pep Guardiolës.

Tani, vëmendja e tij zhvendoset në La Liga, ku pritet të jetë një nga emrat kryesorë të Real Madridit në sezonet e ardhshme.