Betohet në Presidencë anëtari i pestë i Gjykatës Kushtetuese, Altin Binaj

Anëtari i ri i Gjykatës Kushtetuese, z. Altin Binaj është betuar sot para Presidentit të Republikës.

Në një njoftim të shpërndarë nga Presidenca bëhet me dije se ne ceremoninë e zhvilluar në ambientet e presidencës ishin të pranishëm kryetari i Kuvendit të Shqipërisë, Sh. T. Z. Gramoz Ruçi, kryetarja në detyrë e Gjykatës Kushtetuese, znj.Vitore Tusha, Avokati i Popullit, znj.Erinda Ballanca dhe drejtuesja e misionit OPDAT të Ambasadës së SHBA në Tiranë, znj.Michelle Lakomy.

Altin Binaj u votua si anëtari i pestë i Gjykatës Kushtetuese disa ditë më parë nga Parlamenti i Shqipërisë.

Aktualisht në Gjykatën Kushtetuese janë pesë anëtarë si; Vitore Tusha, Elsa Toska, Marsida Xhaferllari dhe Fiona Papajorgji e Altin Binaj, ndërkohë që katër vendet e tjera mbeten vakante. Me zgjedhje e Altin Binajt, tashmë Gjykatës Kushtetuese i duhet edhe një emërim i ri për t’u bërë funksionale. 

Këshilli i Emërimeve në Drejtësi do të mblidhet sot për të përcaktua emrat e kandidatëve për Gjykatën Kushtetuese që do t’i dërgojë Presidentit të Republikës për miratim.

Në garë për plotësimin e vakancës së mbetur janë Aleksandër Toma dhe Përparim Kalo pasi disa të tjerë janë skualifikuar nga gara për shkak se nuk plotësojnë kushtet ligjore.

KED do të bëjë renditjen e këtyre dy kandidatëve në bazë të pikëve dhe më pas do të jetë kreu i shtetit që do të përzgjedhë për t’i dhënë mandatin e gjyqtarit.