Ndonëse numri infektimeve të reja në Kosovë gjatë dy javëve të para të janarit ka rënë, shqetësim mbeten rastet fatale.

Gjatë 24 orëve të fundit janë regjistruar shtatë pacientë të vdekur ndërsa nga kryerja e 1 659 testeve, 296 persona rezultuan pozitivë.

Rastet e vdekjes janë të moshës nga 47 deri në 88 vjeç dhe në total që prej fillimit të pandemisë, Kosova numëron 1 399 vdekje nga  COVID-19.

Nga kryerja e mbi 205 mijë testeve në Kosovë kanë rezultuar të infektuar më shumë se 55 mijë persona. Nga këta mbi 48 mijë pacientë janë shëruar kurse numri i rasteve aktive mbetet pak më shumë se 5 mijë.