Bien të ardhurat, 220 milionë euro më pak në arkat e shtetit, shkak pandemia e COVID-19

Të ardhurat buxhetore gjatë muajit maj ranë me 30 për qind, për shkak të efekteve të koronavirusit.

Sipas të dhënave zyrtare të Ministrisë së Financave në muajin maj u arkëtuan në buxhet 27.5 miliardë lekë, me një tkurrje prej gati 30 për qind me bazë vjetore. Për dy muaj e gjysmë, që prej fillimit të pandemisë, buxheti ka arkëtuar rreth 220 milionë euro më pak në krahasim me të njëjtën periudhë të një viti më parë.

Të ardhurat nga sigurimet shoqërore u tkurrën me 7.5 për qind në muajin maj, me bazë vjetore, teksa kriza preku dhe punësimin dhe shumë kompani u detyruan të nxirrnin nga skema e sigurimeve punonjësit e tyre.

Ndërkohë, defiçiti buxhetor është rritur me 6.7 për qind në 5 mujorin e parë të këtij viti.

Prej 9 marsit 2020, Shqipëria po vuan efektet e pandemisë së COVID-19. Pas një mbyllje prej më shumë se një muaji të aktiviteteve sociale dhe ekonomike. Bizneset po hasin mjaft vështirësi në rinisjen e punës, ndërsa qeveria është detyruar të parashikojë paketa ndihmash financiare dhe gjithashtu rishikojë sistemin fiskal.