​Bilanci i COVID-19 në Kosovë, 32 jetë të humbura dhe 928 të shëruar

Ditët e fundit janë rritur dukshëm rastet me Covid-19 edhe në Kosovë. Mbrëmjen e djeshme rezultuan 53 raste pozitive, ndërsa 7 pacientë të tjerë janë shëruar.

Rastet e reja janë konfirmuar; 18 nga Vushtrria, 18 nga Prishtinë, 11 nga Istogu, 3 Rahovec, dhe nga 1 në Fushë Kosovë, Viti dhe Pejë.

Ndërsa nga data 8 shkurt deri më 13 qershor 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 18.247 persona të dyshimtë në virusin SARS-CoV-2 dhe prej tyre pozitive rezultuan gjithsej 1.437 raste, kurse 32 qytetarë humbën betejën me virusin. Sipas mjekësisë kosovare, këto persona kanë pasur sëmundje të tjera shoqëruese.

Që nga fillimi dhe deri ditën e djeshme, numri i përgjithshëm i të shëruarve në Kosovë ka shkuar në 928.

Në IKSHPK në vazhdimësi përgjatë 24 orëve janë duke u kontaktuar dhe mbajtur në survejim të gjitha kontaktet e rasteve, si dhe kontaktet e kontakteve duke i detyruar për vetëizolim dhe të kërkojnë ndihmë mjekësore nëse kanë simptoma apo shenja të COVID-19.