Bisdat e sulmit ndaj Houthi-ve në Signal, Trump mbron Hegseth

Sekretari i Mbrojtjes, Pete Hegseth, reagoi të hënën ndaj raportimeve se ai ndau detaje rreth një sulmi të afërt kundër rebelëve Houthi në Jemen në një bisedë të dytë grupore në aplikacionin Signal, e cila përfshinte gruan dhe vëllain e tij.

Duke folur nga Shtëpia e Bardhë, ku mori pjesë në një aktivitet familjar, Hegseth e cilësoi raportimin si “njollosje anonime” të nxitura nga “ish-punonjës të pakënaqur dhe media të etura për sensacion”.

“Kam folur me presidentin dhe jemi në të njëjtën faqe gjatë gjithë rrugës. Ne do të vazhdojmë të luftojmë,” tha Hegseth, pa mohuar konkretisht akuzat për ndarjen e informacionit të ndjeshëm ushtarak.

Presidenti Donald Trump doli në mbështetje të Hegseth, duke theksuar se ai ka “besim të madh” tek Sekretari i Mbrojtjes dhe e cilësoi çështjen si një tjetër përpjekje për ta diskredituar.

“Ja ku shkojmë përsëri. Vetëm humbje kohe. Ai po bën një punë të shkëlqyer,” tha Trump për gazetarët. “Pyetni Houthi-t se si po ia dalin.”

Sipas burimeve të ABC News, mesazhet në aplikacionin e koduar Signal përfshinin informacione rreth një goditjeje të planifikuar ndaj Houthi-ve dhe u ndanë me persona që nuk kanë rol zyrtar në mbrojtje – përfshirë gruan e Hegseth, Jennifer, vëllain e tij dhe avokatin personal. Rasti u zbulua pasi kryeredaktori i The Atlantic, Jeffrey Goldberg, u shtua gabimisht në bisedë.

Inspektori i përgjithshëm i Pentagonit ka nisur një hetim të pavarur mbi përdorimin e aplikacionit nga Hegseth për të diskutuar veprime ushtarake jashtë kanaleve zyrtare të sigurisë.

LEXONI GJITHASHTU:

• Turqia do të zgjerojë kërkimet e gazit në Rusi
• Bien shitjet e Tesla-s në SHBA dhe Evropë, rritet papritur kërkesa në Ukrainë