Bisedimet SHBA-Iran në Pakistan, pjesëmarrja iraniane e pasigurt për shkak të sulmeve në Liban

Pakistani po përgatitet të presë delegacionet iraniane dhe amerikane për bisedime sot, por pjesëmarrja iraniane është e pasigurt, pas sulmeve izraelite që vranë më shumë se 300 persona në Liban të mërkurën, duke e vënë armëpushimin në rrezik.

Sulmet izraelite, më vdekjeprurëset në Liban që kur SHBA-të dhe Izraeli filluan një luftë kundër Iranit më 28 shkurt, i bëjnë “negociatat të pakuptimta”, tha të enjten Presidenti iranian Masoud Pesekian.

“Mbajtja e bisedimeve për t’i dhënë fund luftës varet nga respektimi i angazhimeve të SHBA-së në lidhje me një armëpushim në të gjitha frontet, veçanërisht në Liban”, tha Ismail Baghaei, një zëdhënës i shërbimit diplomatik iranian, sipas agjencisë së lajmeve ISNA.

Në kohën e shpalljes së armëpushimit midis “Iranit, SHBA-së dhe aleatëve të tyre” – i cili tani është në ditën e tretë – Pakistani, një vend që ka marrë rolin e ndërmjetësit në këtë konflikt me mijëra vdekje në Lindjen e Mesme, theksoi se armëpushimi do të zbatohej “kudo, përfshirë Libanin”. Megjithatë, diçka që u refuzua më pas nga izraelitët dhe amerikanët.

Nën masa të rrepta sigurie, Islamabadi është shndërruar pothuajse në një qytet fantazmë, pasi u shpall festë për dy ditë – dje të enjten dhe sot të premten. Hoteli luksoz që pritet të mirëpresë misionet është zbrazur nga klientët e tij të zakonshëm.

Zëvendëspresidenti i SHBA-së J.D. Vance pritet të udhëheqë një delegacion amerikan në Pakistan për bisedime me Iranin të shtunën, i shoqëruar nga i dërguari special Steve Witkoff dhe Jared Kushner, dhëndri i Donald Trump, tha Shtëpia e Bardhë.

Duke folur për NBC News, presidenti i SHBA-së tha se ishte “shumë optimist” për mundësinë e arritjes së një marrëveshjeje paqeje, pavarësisht hendekut në qëndrimet e të dy vendeve.