Shoqatat e Biznesit kërkojnë rishikim të paketës fiskale. Në një letër të dërguar në qeveri, ato propozojnë lehtësi të taksave në bujqësi dhe ndërtim, si dhe një plan konkret për ndalimin e transaksioneve me euro.

Tetë shoqata biznesi në vend kërkojnë ndryshime në paketën fiskale për vitin 2025. Në një letër drejtuar qeverisë, ato theksojnë se bizneset e vogla dhe të mesme po përballen me vështirësi financiare dhe një situatë të pasigurt, të ndikuar nga tregu global, i cili ka sjellë një efekt zinxhir të rritjes së çmimeve në lëndët e para.

Me këtë argument, sipërmarrjet kërkojnë uljen e TVSH-së në nivelin 5-7% për agroindustrinë, kompensimin e 20% të TVSH-së për fermerët dhe heqjen e TVSH-së për plehrat organikë.

Në listën e kërkesave është edhe rishikimi në ulje i taksës së ndikimit në infrastrukturë dhe tarifës së depozitimit të dherave. Po ashtu, bizneset kërkojnë rimbursim automatik të TVSH-së.

Në letrën e tyre, shoqatat e biznesit kërkojnë edhe ndalimin e shitjes dhe blerjes me monedha të huaja, një masë që është pjesë e planit për deeuroizimin dhe që mund të ndikojë pozitivisht në kursin e këmbimit valutor, duke e bërë atë më të qëndrueshëm.

Propozimet shtesë të shoqatave lidhen gjithashtu me formalizimin e ekonomisë dhe thjeshtimin e legjislacionit për taksapaguesit.

LEXONI GJITHASHTU:

• Nga porti i ri te zgjerimi i autostradës Tiranë-Durrës, investimet për vitin 2025
• Si ndahet buxheti 2025 sipas ministrive, cili dikaster mer “pjesën e luanit”